Կապանում նվազել է թերթ ընթերցողների թիվը

Կապանում նվազել է թերթ ընթերցողների թիվը
Թերթի կրպակ Կապանում

Կապանում թերթի երեք կրպակ կա: Յուրաքանչյուրը Երեւանից օրական հազիվ 20 թերթ է ստանում, ամեն մի թերթից նվազագույնը մեկ, առավելագույնը՝ վեց օրինակ:

Կապանի մշակույթի կենտրոնի հարեւանությամբ գործող թերթերի կրպակում աշխատող Տիգրանն ընդմանենը վեց մշտական հաճախորդ ունի, վեցն էլ թոշակառու: Տիգրանի կարծիքով Կապանում ամենատարեց ընթերցողը 86-ամյա Վոլոդյա պապն է, ով ամեն անգամ կրպակի մոտ սպասում է Երեւանից առաքվող եկող թերթերին:

Մեկ այլ թոշակառու՝ 72-ամյա Էդիկ Մաթեւոսյանը սովոր է առավոտները թերթ ընթերցել: Հիսուն տարուց ավելի է որպես տեղեկատվության հիմնական աղբյուր թերթ է օգտագործում:

Էդիկ պապը կարդում է տարբեր թեմաներով հոդվածներ ու լուրեր` թե՛ քաղաքական, թե՛ տնտեսական: «Շաբաթական 2 անգամ է իմ նախընտրած թերթը գալիս: «Իրավունք» եւ «Սյունյաց  Երկիր» թերթերն եմ հիմնականում գնում: Բոլորը  նույն բաներն են գրում, բայց  տարբեր ձեւերով, շատ են լինում, երբ կլյաուզա ես տեսնում թերթերի էջերում: Հատկապես հաճելի չի լինում, երբ պետության ղեկավարին վարկաբեկող նյութեր ես ընթերցում, ոչ մեկն իրավունք չունի նախագահին վիրավորելու»,- ասում է Էդիկ պապը:

Կրպակատեր Տիգրանն ասում է, որ վերջին տարիներին թերթ գնող հաճախորդների թիվը եռակի նվազել է: «Ամենապիկ տարին 2008թվականին Էր, երբ մարդիկ լավ էին ապրում եւ230 թերթերն էլ շատ լավ էին վաճառվում: Իսկ էսօր ես վնասով եմ աշխատում, թերթերից շատերը չեն վաճառվում մնում են ինձ վրա: Էս պահին 40 հազար դրամ գումարին համարժեք չվաճառված թեթերի կապոց կա կրպակում»,- ասում է Տիգրանը:

Տիգրանը նկատել է, որ սովորաբար թերթերը լավ են վաճառվում  ձմռանը: Տաք եղանակին ընթերցողների թիվը նվազում է:

«Եթե նախկինում «Հայկակական ժամանակ» կամ «Չորրորդ Ինքնիշխանություն» թերթերից 12 օրինակ էի ստանում, հիմա արդեն 6 օրինակից եմ պատվիրում, գնողներն են քչացել: Մի քանի օրինակ էլ «Առավոտ» օրեթերթից է վաճառվում: Լավ են վաճառվում  մարզական, ֆուտբոլային թերթերը»- ասում է Տիգրանը:

Թերթի կրպակից երիտասարդները գրեթե չեն օգտվում:  Օրինակ, 28-ամյա կապանցի Դավիթը լուրերը կարդում է ցանցային լրատվամիջոցներում: Առավոտյան աշխատանքի անցնելուց առաջ նախ այցելում է իր նախընտրած լրատվական կայքերը, ծանոթանում նորություններին, նոր արդեն անցնում իր ամենօրյա գործին, այնուհետեւ համակարգչի առջեւ նստում է երեկոյան ժամերին եւ ամփոփում օրվա ամբողջ իրադարձությունները: Ինտերնետով նորություններ կարդալն աստիճանաբար ավելի տարածված է դառնում, քան թերթ ընթերցելը:

Մերի Սողոմոնյան, Կապան

Comments

Մեկնաբանել

Type the characters you see in this picture. (verify using audio)
Type the characters you see in the picture above; if you can't read them, submit the form and a new image will be generated. Not case sensitive.
                                

 Media.am by Media Initiatives Center is licensed under a Creative Commons Attribution 3.0 Unported License
Reproduction in whole or in part without reference is prohibited.

Creative Commons License